Gedichte im KÄRNTNER DIALEKT

Mei erschtes Gedicht

(Edith Kienzl)

Mei erschts Gedicht is koa Gedicht,
es is vülmehr a blede Gschicht.
Es is wull schon a Zeitl her,
nur vagiss i's neamma mehr!

I tråg schea fleißi Holz ins Haus,
då steig a Herr van Auto aus.
Kimb auf mi zua, da guate Månn
und fång si glei zan vorstelln ån:

"I bin da Dirschga
von der Au'n,
der mit die Goaß tuat eggn
und mit n'Bock tuat baun!"

I wüll a net verlegn sein,
nur fållt mir går nix Gscheites ein!
I bleggatz' auf mein Hulzkårb hin,
kimb mir nix Bessas in den Sinn:

"Und i bin van Gupper
von Obergösl,
die Lötta sind furt,
es årbat da Esl!"

Schware Muattaspråch

(Edith Kienzl)

Wånnst glabst, die Muattaspråch is leicht,
Bua - dås kånn di schiach betaggl,
auf an oanzign Mundårtwort
kånnst himma gånz schea umahaggl!

Wal, gach a Wort dås spudert si,
es sprigglt und spreizt si - kimb da vür,
und übahammisch stulpast drüba,
åls lagat a Drischpl vor da Tür!

Bringst's neamma hinta, neeamma v'chi,
es steckt dir zwischn Håls und Zähnt,
as wia a z'groaßa Suppmgrudl -
kånnst nur mehr fuchtl mit die Händ!

Und håst du di amål vahåschplt,
fippat dir bestimb die Stimm,
håt di a oanzigs Wort daloudat,
dei scheani Ånspråch is dahin!

Ach låss die Treatschn jå net hänkn,
wenn Du a Wort net ausabringst,
bevor's vadoumplasch di vapleappast,
is gscheida, wennst a Liadle singst!

Du kånnst, wenn du di noch so zåmmreißt,
net s'Låvnttålerisch' studiern!
du muaßt va Årdbirnsterz bis Zwöischpm
die Ausspråch selba ausprobiern!

Wås jeda woaß

(Edith Kienzl)

Van Rachn wird die Lungan hin,
z'vül Schnåps is neamma "Medizin",
van Übafråß wirst kuglrund,
z'vül Umapfloaggan is net gsund!

A Treuebruch bring Seelnschmerz -
und der is wieda schlecht fürs Herz!
Die Spülsucht stürzt di ins Vaderbm,
und van Rauschgift kinnast sterbm!

Was ma draus lernt? - Nix!
Zan Vazweifln - sakrafix!

Die Malboro wird inhaliert,
da übavolle Tisch sich biag!
Lug, Betrug - is Ehrensåch,
a bissl sportln - schon bist schwåch!

Ban Spüln kånn ma sich net zügl,
van Rauschgift, glab i - kriag ma Flügl.
Und Bier und Schnaps sei uns vagunnt,
wer stirb schon gern - "pumperlgsund"?

Was dich noch interessieren könnte...

Ausgewählte Kurzfilme...

Gedichte von Anna Maria Kaiser...

Gedichte von Astrid Lippauer ...

Gedichte von Thomas Tatschl ...

Alle Gedichte auf 4mi.at...

Wissenswertes zu allem Möglichen - Da bist du richtig...

Wie gefallen Dir die Gedichte? Schreib mir doch eine Antwort in mein Gästebuch!

Tipp: Eine Übersetzung der Dialekt-Wörter findest du im Wörterbuch